05maí
Ný síða !
Erum búnar að færa okkur og komnar með nýja síðu og slóð :
WWW.GELLURSEMTRUKKA.COM !
Erum búnar að færa okkur og komnar með nýja síðu og slóð :
WWW.GELLURSEMTRUKKA.COM !
03febrúar
Fréttainnskot á nýju ári !
Vá, FINALLY !
Það er alveg OF langt síðan við komum með einhverja færslu hérna inná, enda verður eiginlega að viðurkennast að það er hálf erfitt að finna skemmtileg umræðuefni í öllu þessu krepputali - við reynum þó okkar besta. Það er þó ekki eina ástæðan fyrir þessum seinagangi í okkur, prófin settu mark á fyrripart desember, skóli og vinna hófst á ný á nýju ári og svo má auðvitað ekki gleyma hátíðunum. En þar sem það er svo langt síðan seinast ætlum við að koma með smá létt blogg bara, og segja ykkur svona örlítið af okkur, hvað hefur drifið á daga okkar undanfarið og hvað við erum að bralla þessa dagana.
Dísa : Allt mjög gott að frétta af mér og mínum. Ég slapp fyrir horn í kreppunni, átti viku eftir af uppsagnarfrestinum þegar þeir drógu hana tilbaka og báðu mig um að vera áfram. Þannig að ég sit enn hér niður í Ingvari Helgasyni að svara í síma fyrir verkstæði B&L. Þeir báðu mig líka um að vinna klukkutíma lengur þannig að ég er komin með manneskju í vinnu við að sækja dótturina til dagmömmunnar. Sölvi minn er enn að vinna hjá SV bílum en frá og með 1. febrúar verður hann bara í 50 % vinnu ef að verkefnastaðan hjá fyrirtækinu verður léleg. Það er þó vonandi að til þess komi ekki þó að það væri nú ágætt að hafa kallinn heima að þvo þvott og skúra ! Ég vil líka segja við þá sem að eru að glíma við atvinnuleysi eða fjárhagsörðuleika að öll él styttir upp um síðir, hlutirnir geta orðið mjög svartir en trúið mér ljósið á eftir að lýsa. hugsa bara jákvætt og reyna að vera kát og glöð.
Linda : Ég er nú ekki með jafn jákvæðar fréttir og hún Dísa mín. Um miðjan nóvember dó litli Dúddi okkar í aðgerð og það var ótrúlega sárt og með eindæmum erfitt, við eigum þó lítinn voffa núna sem er hálfs árs og heitir Stormur. Mér var svo sagt upp hjá GV Gröfum fyrir áramót og hætti þar um mánaðarmótin nóvember / desember. Ég hafði verið í þremur fögum með vinnunni og stefndi bara á að rumpa prófunum af þarna í desember og kláraði það sem ég ætlaði mér. Ég ákvað þó að nýta tækifærið og líta á jákvæðu hliðarnar og skellti mér í skóla bara áfram að klára stúdentinn minn. Ég er að stefna á að útskrifast í sumar gangi allt að óskum. Það leit út fyrir að Steinó slyppi með skrekkinn þegar Ingi Rúnar neyddist til að segja honum upp sökum slæmrar verkefnastöðu. Hann fékk vinnu hjá KM Malbikun í lok október þar sem hann var ráðinn í snjómokstur uppá Öxnadalsheiði og hann fílaði sig í botn þar og allt virtist ganga að óskum þangað til að hann lenti í óhappi fyrir um þremur vikum síðan eins og flestir vita og var svo sagt upp fyrsta daginn í vinnunni eftir slys og hætti núna um mánaðarmótin janúar / febrúar. Hann er þó eitthvað að keyra sementi fyrir Ómar og er alsáttur að komast aftur á þjóðveginn. Ég skellti mér hinsvegar í mótorhjólaprófið fyrir áramótin, það bóklega og vona að maður geti hjólað í sumar. Vona svo að gellurnar hérna skelli sér bara líka og að við getum farið í hjólatúr saman !
Rósa : Ég er auðvitað enn í fæðingarorlofi sem er bara frábært þó mig hlakki nú til að fara að vinna aftur. Elís Örn er að verða 7 mánaða og er alger risi. Sumir nánast gapa þegar ég segi hvað hann er gamall. Hann er sem sagt orðinn 71.5 cm og 9.2 kg - litli kuggurinn hennar mömmu sinnar. Svo er hann kominn með tvær tennur og það eru tvær að brjótast í gegn as we speak. Hann er einnig að ná tökum á að sitja og sýnir smá framfarir við að reyna að skríða af stað, en hann vill samt bara fá að labba. Hann elskar göngugrindina sína því þá getur hann elt mig um íbúðina. Elís fer til dagmömmu í lok mars og ég byrja að vinna snemma í apríl aftur í Hagkaup en ég veit ekkert hvað ég fæ að gera né hvort ég fái svona fínt bréf, en það kemur bara í ljós en ég er ekkert stressuð yfir því. Komi það sem koma skal bara. Ég er svo að hugsa um að byrja í Háskólabrú á Keili og fá stúdentinn til að opna möguleika og fara svo sennilega í framhaldinu á Hóla. Þá er ég allavegana komin með stúdent og get valið hvað ég geri í framtíðinni. Auðvitað eru allar mínar fréttir um litla kút því maður gerir lítið annað en að leika við hann.
Sigrún : Það er nú frekar lítið í fréttum af mér. Próftörnin fyrir jólin var frekar strembin og stutt á milli prófa og ég setti að sjálfsögðu alla mína orku í þau. Fyrir þá sem ekki vita hef ég verið að stunda nám, en ég er lyfjafræðinemi í Háskóla Íslands. Ég held áfram í því námi núna, og ákvað að vera ekkert að reyna að vinna með því það er bæði tímafrekt og svo er náttúrulega líka lítið sem ekkert í boði. Ég fór norður, heim í faðm fjölskyldu og vina, um hátíðirnar og það var frábært ! Ég ætla svo bara að vona að við stelpurnar fáum einhverja vinnu í sumar og að ástandið verði farið að snúast til betri vegar fyrir okkur öll.
Bestu kveðjur !
23desember
Gleðilega hátíð !
Við viljum óska ykkur öllum og fjölskyldum ykkar gleðilegrar hátíðar og þakka fyrir komurnar og þátttökuna á síðunni okkar, en við erum mjög þakklátar fyrir það ! Árið er nú senn á enda, og mikil tilhlökkun fyrir nýju ári, sem mun vonandi færa okkur öllum gleði, gæfu og ný tækifæri. Við vonumst að sjálfsögðu til þess að þið fylgist með okkur á nýju ári og vonandi sjáumst við einnig á vegunum ! Við munum koma með fréttir af okkur í byrjun janúar.
Bestu jólakveðjur,
Linda, Sigrún, Rósa og Dísa !
23október
Efnahagsástandið ?
Við ætlum ekki að tala um stöðu bankanna eða hvort við viljum lán frá Rússum eða Alþjóðagjaldeyrissjóðnum, en það hefur væntanlega ekki farið framhjá neinum hvernig efnahagsmálum er háttað á Íslandi í dag. Fjármálakreppan svokallaða er að bitna á flest öllum, fyrirtæki og heimili eru að líða fyrir græðgi stóru kallanna og margir eiga hreinlega rosalega erfitt með að ná endum saman. Þetta ástand bitnar ekki síður á okkur í trukkabransanum, og langaði okkur stelpunum til þess að fjalla lítillega um þetta og þá einna helst að fá ykkur til þess að koma með reynslusögur af ykkar ástandi og skapa góða umræðu um þetta, í þetta skiptið verður nafnleynd leyfileg, en þó væri kannski gott ef þið gætuð skrifað eitthvað í nafndálkinn ef fleiri en ein athugasemd væri skrifuð af sama aðila - einnig gerir það öðrum auðveldara að svara viðkomandi.
Þannig er nú mál með vexti að það er sett stopp á margt í þessum bransa í dag, fyrirtæki fá ekki að leysa út gámana sem standa á bryggjunum, sumir geta ekki keypt sína vöru því það fæst enginn gjaldeyrir, sveitar- og bæjarfélögin hætta við framkvæmdir sem aldrei fyrr, en það gerir Vegagerð Ríkisins og Ríkið sjálft einnig. Fólk hefur ekki lengur efni á því að byggja fínu húsin sín, og byggingafyrirtæki græða ekkert á því að byggja lengur því það einfaldlega selst ekki. Af þessum völdum minnkar flutningur á lengri leiðum, hvort sem það telst til gámaflutninga eða venjulegs flutnings. Lítið er af grunnum til þess að taka uppúr og keyra ofan í, steypa veggi og græja, og vegaframkvæmdir hafa margar hverjar verið settar á bið sama hversu mikil þörf er á þeim. Hægt væri að halda áfram endalaust að tala um hvernig þetta hefur svo keðjuverkandi áhrif á byggingaraðila, verktakana, flutningsaðila sem flytja efnið í húsin til seljendanna, olíudreifingaraðila, sementsflutninga, verslanirnar og svo framvegis. Þetta allt verður svo til þess að innkoma minnkar, lánin hækka og fækka þarf starfsfólki.
En hversu illa standið þið í dag ? Sérðu fram á að hafa vinnu eftir áramót ?
Höldum að allir geri sér grein fyrir alvöru málsins, en hvað finnst ykkur að mætti gera til þess að reyna að sporna við þessu atvinnuleysi og endalausum gjaldþrotum ? Auðvitað á að reyna að halda í einhver verkefni í staðinn fyrir að hætta við allt, það þarf að reyna að útvega fólk vinnu svo að það endi ekki bara allir á atvinnuleysisbótum - heldur ríkisstjórnin að það sé eitthvað hagstæðara ?
Endilega segið ykkar skoðun, segið frá ykkar stöðu í dag, og allt má þetta vera undir nafnleynd í þetta skiptið. Við afsökum innilega hversu lengi þetta blogg var að koma frá okkur, en getum glatt ykkur með því að það er verið að setja upp athugasemdakerfi við myndirnar sem vonandi verður virkt sem fyrst. Þökkum kærlega fyrir þátttöku ykkar í seinustu könnun þar sem við spurðum hvernig ykkur finndist tilkynningar okkar á Geiranum um uppfærslur á síðunni vera. Alls tóku 88 manns þátt, 54 eða 61% fannst þær þægilegar, 14 eða 16% fannst þær óþarfi, 12 eða 14% fannst þær ekki skipta sig neinu máli og að lokum voru 8 eða 9% sem voru hlutlausir. Vonum að þátttaka í nýrri könnun okkar verði ekki síðri, en við höfum ákveðið að halda áfram að tilkynna um uppfærslur okkar á Geiranum.
Við elskum ykkur öll !
Baráttukveðjur í súru sem sætu,
Linda, Sigrún, Rósa og Dísa.
10október
Tæknilegir örðugleikar !
Vildum bara tilkynna ykkur það að við erum ekki orðnar algjörlega ruglaðar í þessu efnahagsástandi, heldur er verið að klára að taka www.bloggar.is kerfið í gegn og þess vegna koma ekki lýsingar við myndirnar sem nú eru komnar í albúmið "Nýtt !", en það albúm á að sjálfsögðu að innihalda myndir hvers mánaðar sem er að líða hverju sinni eins og það hefur alltaf gert. Vonandi kemst þetta á rétt skrið hið fyrsta.
Hinsvegar til þess að koma með smá gleðifréttir í leiðinni, að eftir stutta skoðun á þessu nýja kerfi, virðist það lofa mjög góðu, en það sýnist á öllu að hægt verði að skrifa athugasemdafærslur við sérhverja mynd í myndaalbúmunum - en við höfum einmitt beðið eftir því að kerfið muni einhvern daginn verða þannig og vonandi mun sú ósk okkar rætast núna. Það virðist vera margt annað nýtt inná þessu, en við eigum eftir að skoða þetta allt betur og reyna eftir bestu getu að gera síðuna okkar flottari og skemmtilegri um leið, sé það í boði.
Með kærri kveðju, von um að allir bíði spenntir og kíki reglulega,
Linda, Sigrún, Rósa og Dísa !
28september
Trukkadagur og trukkakvöld !
Laugardaginn 20. september var haldin stórglæsileg trukkasýning við Smáralind í Kópavogi og skelltum við Rósa og Sigrún Ingveldur okkur á hana. Þar mátti finna ýmsa dráttarbíla, kassabíla, rútur, krana og vélar af ýmsum toga. Veðrið var nú frekar dyntótt og dundi meira að segja yfir haglél á tímabili en þá var hægt að skjóta sér inn í boddý frá Jóni og Margeiri og njóta góðra veitinga. Eitt af aðalnúmerum sýningarinnar var glæný Scania R620 frá Heklu. ET var með nokkra bíla á svæðinu ásamt Jóni & Margeiri, Kropptaki, Gámaþjónustunni, Nesfrakt, Smellinum og Jóa Glæp. Mótmælandi Íslands, Sturla, var á svæðinu með Volvoinn sinn og vélavagn sem á var beltagrafa á uppboði.
Sýning sem þessi hefur verið haldin nokkrum sinnum áður hér í borg en þó aldrei komist almennilegt skrið á hana. Það er von allra að þeir sem sáu fyrir þessari sýningu endurtaki leikinn að ári og að þetta verði að árlegum viðburði. Eiga þeir heiður skilið þeir Olli, Hörður og Gestur ásamt auðvitað öllum þeim sem lögðu hönd á plóginn.
Seinna sama dag var haldið Trukkakvöld Dóra Tjakks á Players og fórum við saman Dísa, Rósa og Sigrún, en Linda komst því miður ekki að norðan. Það var margt um manninn þegar við mættum enda kannski aðeins of seint, en seint koma sumir en koma þó ! Þema kvöldsins var bleikt og mátti alveg merkja það. Stelpurnar á barnum voru allar með bleika hatta og voru nokkrir karlmenn sem tóku áskoruninni um að mæta í bleiku, einn gekk svo langt að mæta í bleikri brók og gæti vel verið að við skellum mynd að því hérna inn. Trukkastelpurnar voru einnig vel merktar með borða og kórónur og voru bara flottar.
Veitt voru verðlaun í keppninni um fallegasta bíllin og úrslitin urðu þessi:
1.sæti: Sigurvin Leifsson á Smellinn BENZ
2.sæti: Sigurbjörn á IVECO
3.sæti: Magga hjá Jón og Margeir á VOLVO
Þessi þrjú áttu þetta svo sannarlega skilið, alveg gullfallegir bílar og vel hugsað um þá. Scania menn og konur verða greinilega að fara taka sig á fyrir næstu keppni ! Reyndar sýndu sumir virkilega barnalega hegðun og púuðu sigurvegarana niður við verðlaunaathöfnina, taki það til sín sem eiga það. Algjörlega óþarfi og fáránlegt í alla staði. Þetta var kosning og svona voru úrslitin og áttu þessi leiðindi svo engan veginn heima þarna.
Dóri Tjakkur fékk einnig viðurkenningarstyttu frá trukkurum fyrir það að vera búin að skipuleggja þessi kvöld síðustu 15 ár. Hann átti þetta svo sannarlega skilið og færum við honum miklar þakkir fyrir. Hann reyndar sagði þegar hann tók við styttunni að hann myndi aldrei gera þetta aftur en það er nú bara ekki tekið gilt, en það mætti nú kannski einhver taka sig til og aðstoða kallinn við það næsta.
Bjórinn rann vel ofan í viðstadda og er ekki annað hægt en að þakka styrktaraðilum kærlega fyrir, án þeirra hefði þetta ekki verið hægt. Kvöldið tókst vel í alla staði og var mjög vel mætt og ætla mætti að allir hafi skemmt sér mjög vel. Gaman að hitta nýja og gamla vinnufélaga og ræða hin ýmsu mál. Hljómsveitin Sixties hélt svo uppi stuðinu langt fram á nótt. Myndir frá kvöldinu eru í myndalbúminu. Við þökkum kærlega fyrir okkur !
10september
Hvað pirrar þig í umferðinni ?
Þó að við viljum allar að sjálfsögðu vera bílstjórar sem tökum þetta allt saman á jafnaðargeðinu, þá verður bara að viðurkennast að það er oft á tíðum afskaplega erfitt. Við erum öll mannleg og enginn er fullkominn, þar á meðal við hörkutólin, en samt ætlum við að gera þennan lista sem við höfum allar tekið saman og leyfa ykkur að lesa hvaða atriði það eru sem að pirra okkur mest í umferðinni. Nú er af mörgu að taka og listinn því frekar langur, en aftur á móti er þetta skemmtilegt umræðuefni sem allir geta tekið þátt í.
Að sjálfsögðu tökum við ofan fyrir því fólki sem hefur sig í það að hreyfa sig og hefur tíma í það svona yfir höfuð. Hjólafólkið, eins duglegt og það er, mætti samt alveg hjóla annarsstaðar en á miðjum götum og vegum landsins. Það er alveg merkilegt að umferðin þurfi að staðna sökum þess að þau nota staði þar sem bílaumferðin er, í stað þess að nota gangstétt eða vegöxl sem er oft bara rétt til hliðar við þau og bíður uppá nægt pláss fyrir reiðhjól. Talandi svo um aðra vegfarendur en þá sem eru á ökutækjum, þá lenti ein okkar í því um daginn að kennarar röltu um allan bæ með nemendur sína sem voru um það bil 8-9 ára gömul, þau höfðu engan hemil á þeim, krakkarnir voru útum allt og sum þeirra gengu beint fyrir framan nefið á kennaranum sínum hlið við hlið svo þau náðu langt útá götu og hugsuðu alveg um allt annað en alla umferð bíla og trukka sem þeysti þarna framhjá þeim !
Þá er komið að sjálfri stefnuljósanotkuninni, en þar gætum við eflaust talið upp endalaust. Það vita allir að það er búið að planta niður hringtorgum sem aldrei fyrr, en fólk virðist samt ekki enn kunna á þau ! Það er gjörsamlega óþolandi að vera á fulllestuðum trukk og koma að hringtorgi, bíða eftir bíl sem er inní því og hann rúntar svo bara salírólegur útúr því á þeim stað sem er næstur manni án þess að gefa stefnuljós eða neitt þannig að maður geti haldið áfram án þess að þurfa að stoppa og taka af stað fyrir ekkert. Stefnuljósið kemur líka oft alltof seint, bæði í hringtorgum og í beygjum og eins útá þjóðvegi þegar fólk ætlar að stöðva bílinn útí kanti eða jafnvel á útskotum, það kemur bara svona þegar höndin er að færast upp að stönginni eingöngu af því að stýrið er að hreyfast. Hugtakið "Betra er seint en aldrei" á því miður ekki við í þessum tilfellum.
Það er óþolandi hvað það eru margir að kafna úr tillitsleysi í umferðinni. Fólk er tregt að hleypa manni svo að maður geti skipt um akrein, það gefur manni yfirleitt ekki séns á að möndla bílinn og bakka eitthvað þó það sé jafnvel á merktu vinnusvæði, og það liggur við að það hreinlega líti á vörubíla sem pöddur sem þarf bara hreinlega að keyra yfir til að losna við. Auðvitað er til almennilegt fólk inná milli sem hefur skilning á þessu, en það er alltof sjaldan. Það er líka alltof oft sem að fólk svínar á mann og það má bara hreinlega þakka fyrir það að vera á lífi ! Sumir eru bara gjörsamlega í eigin heimi og eru ekkert að spá í hvað bíllinn sem er að koma á móti sé þungur og hvort sem hann er, að þá geti hann ekki stöðvað á punktinum eins og einhver smábíll. Margir spá ekki í því hversu langur bíllinn er heldur og að hann taki meira pláss, það mætir manni bara í beygju og skilur ekkert í því hvers vegna maður taki meira pláss en Aygo, og oft á tíðum virðist það þurfa að keyra undir vagninn eða grindina hjá manni til að skilja það og þá fær flutningabílstjórinn "ASSHOLE" lúkkið.
Svo er ekki hægt að komast í gegnum svona umræðu án þess að minnast á hræðsluliðið, en það er fólk sem keyrir hægt og á misjöfnum hraða en vill svo ekki hleypa neinum frammúr sér, heldur gefur það bara í. Fullt af brjálæðingum taka svo ekki mark á því þegar maður gefur þeim merki um að óhætt sé að fara frammúr, heldur bíða þangað til að þeir halda að það sé óhætt að fara, en þá er náttúrulega blindhæð og óbrotin lína og upplagt að standa kaggann að þeirra mati ! Oftar en ekki sér maður þá bílana koma á móti og þarf að negla niður til þess að bjarga þessum vitleysingum. Maður fær það einhvernveginn á tilfinninguna að maður beri ábyrgð á því hvort bílstjórar með slíkan akstursmáta lendi í slysum og það hreinlega fer í taugarnar á manni. Talandi um hraða þá megum við ekki gleyma liðinu sem fer alltof hratt, æðir frammúr öllum á ofsahraða og í brjálaðri umferð. Það er ágætt að sumir hafa það gott í kreppunni og geta borgað þessar himinháu sektir sem fara allar í Ríkiskassann - ekki veitir nú af !
Bílstjórar pallbíla og annarra bíla með risa aftanívagna á leið í útileguna eru oft ekki með hliðarspegla og sjá ekki neitt hvað er fyrir aftan sig, keyra því á miðjum vegi og gera sér enga grein fyrir breidd tækisins. Sumir vagnanna eru ekki skoðaðir, margir ljóslausir eða tengdir vitlaust, bíllinn jafnvel ekki með burðargetu til að draga allt draslið og bílstjórinn varla hæfur til þess að stýra fleyinu ! Núna, þegar svo farið er að hausta fer maður að taka eftir ógrynni af bílum sem eru ljóslausir, þá jafnt fólksbílar og stærri ökutæki, en það er virkilega leiðinlegt að mæta slíkum bílum í myrkrinu og ætti fólk að sýna smá lit og hafa metnað til að vera með öll ljós í lagi. Sigrún Ingveldur fór einmitt í það að skipta um peru í bílnum sínum um daginn, og afgreiðslumaðurinn kom að henni og spurði hvort hún væri að gera bílinn klárann til að fara í skoðun - eins og það væri eina ástæðan til þess að hafa öll ljós í lagi.
Sumt fólk hefur svo allann daginn til þess að koma sér á milli staða, það er nákvæmlega ekki að fara að gera neitt annað hvort sem er svo það er náttúrulega um að gera að kíkja á rúntinn á Þjóðveg 1, horfa á kýrnar bíta gras, lömbin hlaupa um túnin og hrossin reyna að riðlast á hryssunum - þetta sérðu allt ef þú dólar þér bara á 40 km/h í hálftíma ! Hvað er betra ? Við skulum svo ekki gleyma börnunum okkar, því það er líka óþægilegt þegar lítil börn koma með foreldrum sínum, sem eru bílstjórar, í vinnuna og svo eru börnin að skottast í kringum bílinn á meðan verið er að lesta eða losa bílinn. Maður kemur svo inná svæðið og sér barnið en þegar maður leggur aftur af stað veit maður ekki hvort barnið sé inní bílnum eða kannski nálægt manns eigin bíl.
Að lokum kemur svo aðeins af okkur. Nú er Sigrún Ingveldur byrjuð á fullu aftur í Háskólanum, Linda Björk verður að vinna á fullu hjá GV Gröfum með fullu fjarnámi, Rósa Vigdís er heima með sinn yndislega dreng og Vigdís Sigríður er að vinna hjá B&L umvafin eðalvögnum og er að sjálfsögðu að ala upp stelpuna þeirra Sölva líka. Við nýtum því bara tækifærið og þökkum innilega fyrir sumarið og minnum á myndirnar okkar, en það eru komnar nýjar myndir, og viljum endilega fá ykkar skoðanir á málunum í athugasemdir og að sjálfsögðu kvitt í gestabókina okkar. Við verðum svo ferskar með myndir af Trukkakvöldinu í lok mánaðarins !
25ágúst
Bílstýrur erlendis !
Í síðustu færslu fjölluðum við um kvenkyns bílstjóra hér á landi. Þrátt fyrir að konur hafi verið undir stýri í þónokkur ár hér hefur orðið mikil fjölgun undanfarin ár og höfum við líkt því við að nokkurskonar tískubylgja sé í gangi. Við fjölluðum nýlega um skondin viðbrögð sem við sjálfar höfum fengið við vinnu okkar og geta eflaust allar bílstýrur landsins nefnt dæmi um fólk sem missir hökuna í gólfið eða snýr sig nánast úr hálslið við að sjá kvenmann undir stýri á stóru ökutæki. Það virðist því enn vera frekar merkilegt og má í því samhengi nefna fréttir í sjónvarpi og umfjallanir í blöðum um þetta.
Því spurðum við okkur, hvernig ætli þetta sé erlendis ? Séu leitarorðin “female trucker” googluð má finna ýmsar áhugaverðar síður og fréttir. Hægt er að finna myndbönd á afþreyingarvefnum www.YouTube.com af kvensum að keyra við ýmis tækifæri og meira að segja tónlistarmyndband með lagi sem fjallar um kvenkynsbílstjóra ! Þar má meira að segja finna myndbandsbrot tekið úr breskum fréttamiðli, en fréttin er um unga stúlku sem passar ekki í staðalímynd flutningabílstjóra, en hver okkar gerir það svo sem? Þessi frétt svipar mjög til einnar sem var gerð hér á landi í kjölfar innflutnings á bíl sem mönnum þótti vægast sagt sérstakur, bleiki Volvoinn sem kom til landsins síðasta vor. Það áhugaverðasta við bresku fréttina er það að stelpan talar um hversu erfitt sé að losa stólinn á bílnum, það sé sko það erfiðasta við þetta allt saman. Hún notar þá aðferð að festa beltið sitt við handfangið og notar svo allt það afl sem hún getur safnað til að losa stólinn. Mælum með að fólk skoði og látum því slóðina fylgja: http://www.youtube.com/watch?v=vIQ8P_CJtpI.
Aðra áhugaverða frétt er að finna á vefmiðlinum www.egypttoday.com. Hún fjallar um fyrstu og einu konuna sem keyrir flutningabíl í Egyptalandi. Hún er það áhugaverð að tengillinn fylgir hér með http://www.egypttoday.com/article.aspx?ArticleID=8088 tekið 17.08.08. Bendum fólki á að fréttaritaranum þykir það hin mesta kaldhæðni að konan skuli keyra MAN!
Til er heimasíða, www.ladytruckdrivers.com en þar er hægt að leita sér að vinnu, þar er spjall, uppskriftir, slóð á Women in Trucking Association – félag kvenkynsbílstjóra og meira að segja stefnumótaþjónusta ! www.WomenInTrucking.org er svo svipuð síða, en ítarlegri. Þar má finna fréttabréf, greinar, sögur frá trukkakonum, áhugaverðir tenglar og fleira. Það er áhugavert að vita að til sé félag kvenbílstjóra og spurning hvort slíkt félag verði sett á laggir á Íslandi einhverntíman í náinni framtíð. Allavega væri það gaman og jafnvel að hafa hópferð á trukkasýningu úti í heimi – bara stelpur ? Svo er gaman að minnast á að búið er að gefa út myndina Alligator on the Zipper, en hún segir sögur 7 kvenna sem samanlagt hafa ekið 1,4 milljón mílur um Bandaríkin.
Okkur fannst mjög gaman að skoða þetta allt, tölum nú ekki um fróðlegt, og henda þessu fram svo að aðrir geti skoðað sé áhuginn fyrir hendi. Virkilega gaman að horfa á þessi myndbönd, fínasta skemmtiefni. En svona ef við þurfum að benda ykkur á það, ykkur sem hafið ekki tekið eftir því kannski, að þá er komin ný kvensa í hópinn, hún Dísa. Hún er hörkukvendi, eins og við hinar að sjálfsögðu, var áður hjá Háfelli og Skeljungi, en er núna að ala upp litla verðandi trukkaskvísu og auðvitað hann Sölva sinn hjá Byko – fullt djobb það !
En við ljúkum þessu í sinni með niðurstöðum síðustu könnunar, en þar spurðum við á hvaða forsendum fólk teldi flestar stelpur vera í þessum bransa. Um 23%, eða 17 manns, töldu flestar stelpur vera í akstri á röngum forsendum, 41%, eða 30 manns, töldu þær vera á réttum forsendum og 36%, eða 27 manns, sögðu það ekki skipta sig neinu máli. Við settum inn nýja könnun til hliðar og vonumst eftir jafngóðri þátttöku Takk kærlega fyrir góða þáttöku í athugasemdum og könnunum sem við höfum sett inn.
10ágúst
Nýjasta tískubylgjan ?
Já fínt, já sæll !
Takk öll sömul fyrir síðast, reyndar orðið þónokkuð langt síðan það var og mættum við alveg skammast okkar fyrir það, og gerum það ef út í þá sálma er farið. Við vonum samt að þið gefist ekki upp á okkur og haldið áfram að fylgjast með síðunni og myndunum - komnar nýjar inn fyrir Júlí og í Nýtt, við erum svo með margt í vinnslu og komnar með margar hugmyndir þó svo að það hafi aðeins látið á sér standa að koma þeim í framkvæmd.
Við skvísurnar vorum hinsvegar að ræða saman um daginn og upp kom málefni sem hefur nú reyndar komið upp áður. Meiraprófið gengur nú yfir okkur dömurnar eins og hin argasta tískubylgja, ótrúlegustu manneskjur eru í meiraprófinu eða komnar með það og margar virðast gjörsamlega sjá þetta í hyllingum og virðast ekki stefna á neitt annað í lífinu því þetta sé svo æðislegt, sem það náttúrulega er að okkar mati. Við eigum samt sem áður svona hálf bágt með að trúa að þetta sé í flestum tilfellum eitthvað annað en bara svokölluð tískubylgja. Hvar var áhuginn seinustu 10 árin ? Afhverju blossar þetta allt í einu upp núna ? Erum við kannski bara að upplifa kynslóð kvenna með viti, eða ekki ? Að sjálfsögðu hefur okkur kvensunum í þessari stétt fjölgað smátt og smátt, en núna virðumst við spretta upp eins og flugur í flagi !
Við erum ekki að segja annað samt en að það sé að sjálfsögðu ávallt gaman að fá nýjar stelpur inní þetta sem hafa áhuga og löngun til þess að vera í þessu, bara frábært að eignast vinkonur sem eru á svipuðu leveli og hægt að ræða við um þetta áhugamál og hugsa : "Vá, ég trúi varla að ég eigi vinkonu sem nennir að hlusta á mig og virkilega skilur mig í þokkabót !". Það er samt álíka gaman að fá þannig stelpur inní þetta starf með okkur, eins og það er ömurlegt að sjá stelpur koma inní þetta með engann áhuga né vilja til þess að standa sig. Þær vilja því oft eyðileggja þá ímynd sem við hinar erum að reyna að skapa, að við séum hörkutól sem kunnum að keyra, skrúfa og smyrja og séum í þessu starfi af áhuga en ekki athyglissýkinni einni og von um að geta druslast um allann bæ með því að flassa teininu í smettið á næsta hnakka. Ein okkar ræddi til dæmis við unga stúlku sem er í meiraprófinu, og hún glopraði því útúr sér að hún væri hálfhrædd við þetta allt saman, hefði lítinn sem engann áhuga á þessu og væri svona aðallega í þessu vegna þess að kærastinn hennar vildi að hún tæki prófið. Hver er tilgangurinn annar en bara að vera "inn" ? Nú, svo virðast sumar hreinlega varla sjást undir stýri á trukk nema að koma fram í sjónvarpinu. Er þetta orðin nýjasta gerð auglýsingaherferða fyrir fyrirtæki ?
En í guðana bænum, ekki taka þessu sem við séum að drulla yfir allar aðrar stelpur í þessu fagi, því það er ekki þannig þó svo að mörgum finnist þetta eflaust hljóma þannig. Tilgangurinn einn með þessum skrifum er að velta upp spurningum á milli okkar allra, hvort þetta sé bara tískubylgja eða eki, en að sjálfsögðu kemur okkar skoðun greinilega fram hvað varðar áhugalausar stúlkur í þessu sem eru að eyðileggja álit annarra á okkur sem leggjum okkur fram.
Þessi færsla er alveg þess virði að hafa könnun með, svo hún er hér til hliðar svo þið getið kosið aðeins um þetta og sýnt smá lit, en ekki hika við að skrifa í athugasemdirnar líka ef ykkur langar til.
Lifið heil !
Við lofum svo að blogga aftur áður en jólin koma, haha !
11júlí
Lítill prins er fæddur !
Hún Rósa okkar kom litla prinsinum sínum í heiminn í nótt, en hún var sett þann 7. júlí. Hann fæddist klukkan 04:42 og viktaði 3430 grömm, mældist 50 cm og er sem sagt tæplega 14 merkur. Hann er víst voðalega góður og sætur, eflaust bara þreyttur eftir þessi átök - bíddu bara Rósa, hann lætur sko heyra í sér fljótlega ! Hah. En við höldum að þetta hafi bara allt gengið eins og í sögu hjá þeim mæðginum, meðgangan gekk víst rosalega vel og Rósa kjéllan hefur eflaust staðið sig með eindæmum vel þarna eins og fyrri daginn !
Við hlökkum bara mikið til að fá að sjá krílið, hann er án efa eini drengurinn enn sem komið er sem fær að vera meðlimur hérna, heppinn hann. Erum alveg vissar um að hann verði duglegur og frábær strákur, sterkur og ákveðinn, alveg rétt eins og mamma sín ! Við viljum því óska Rósu okkar innilega til hamingju með þennan æðislega áfanga og frábæra dreng, og óska honum innilega til hamingju með mömmu sína !
Ástarkveðjur til ykkar með von um bjarta framtíð og velgengni,
Linda Björk og Sigrún Ingveldur.